Ընձառյուծի պահպանության արդյունավետ կազմակերպումը փոխկապակցված է վայրի բնության մեջ ընձառյուծի և նրա որսատեսակների մոնիթորինգի հետ: WWF-Հայաստանի կողմից իրականացվող մոնիթորինգի հիմնական նպատակն է պարզել թիրախ կենդանատեսակների՝ կովկասյան ընձառյուծի, բեզոարյան այծի և հայկական մուֆլոնի թվաքանակի դինամիկան և տեղաշարժման առանձնահատկությունները հարավային Հայաստանում: Բացի դրանից մշտադիտարկման համակարգը հնարավորություն է ընձեռում ստանալ տեղեկություններ այլ խոշոր կաթնասունների վերաբերյալ՝ արջ, լուսան, այծյամ, վայրի խոզ և այլն:
Մոնիթորինգը իրականացվում է կենդանիների կողմից ակտիվորեն օգտագործվող արահետներում տեղադրվող ֆոտոխցիկների միջոցով, որոնք ֆոտո/վիդեո տարբերակով նկարահանում են ֆոտոխցիկի մոտով տեղաշարժվող կենդանուն: Բացի դրանից վայրի բնության մեր և գործընկեր կազմակերպությունների մասնագետները իրականացնում են պարբերական դաշտային այցեր՝ բեզոարյան այծերի և հայկական մուֆլոնի դիտարկումներ, հետքերի արձանագրում և կղկղանքի հավաքագրում ԴՆԹ անալիզի ենթարկելու համար: Մոնիթորինգին են մասնակցում վերջերս ստեղծված ընձառյուծի խնամակալների ցանցի անդամները, պահպանվող տարածքների տեսուչները և այլն:
WWF-Հայաստանը կարևորում է երիտասարդ սերնդի բնապահպանական դաստիարակությունը։ Այս պատճառով WWF-Հայաստանը Երևանում և մարզային տարբեր դպրոցներում կազմակերպում է բնապահպանական ճամբարներ, հատուկ դասընթացներ, շնորհանդեսներ և կրթական էքսկուրսիաներ։ Արարատի, Սյունիքի, Վայոց Ձորի մարզերի և Երևանի դպրոցների աշակերտներն իրենց մասնակցությունն են ցուցաբերել կովկասյան ընձառյուծի պահպանության աշխատանքներում։ Կրթական միջոցառումների ժամանակ հասարակությանն են ներկայացվել կովկասյան ընձառյուծի կարևորությունը, ինչպես նաև այն գործոնները, որոնք բացասական ազդեցություն են ունեցել այս կենդանատեսակի վրա։
Կրթական գործունեությունը ներառում է նաև համագործակցություն կրթական հաստատությունների, մասնավոր հատվածի և միջազգային կազմակերպությունների միջև։ Այս համագործակցության շրջանակներում կազմակերպվել են ցուցահանդեսներ և տարբեր լուսանկարչական մրցույթներ՝ հանրային իրազեկման բարձրացման նպատակներով։
Կովկասյան ընձառյուծի և նրա ապրելավայրերի պահպանությունը իրականացվում է պահպանվող տարածքների ստեղծման և դրանց կարողությունների զարգացման միջոցով: Վերջին տասնամյակում WWF-Հայաստանի և ՀՀ Բնապահպանության համատեղ ջանքերով ընձառյուծի ապրելավայր կամ միգրացիոն ուղղի հանդիսացող հարավային Հայաստանում ստեղծվել են նոր պահպանվող տարածքներ՝ «Արևիկ» ազգային պարկ, «Խուստուփ» և «Զանգեզուր» պետական արգելավայրերը, ինչպես նաև Կովկասում առաջին համայնքային պահպանվող տարածքը՝ Գնիշիկ պահպանվող լանդշաֆտը: Նորաստեղծ պահպանվող տարածքների ընդհանուր մակերեսը կազմում է ավելի քան 73.000 հա: WWF-Հայաստանը աջակցում է նաև պահպանվող տարածքների անձնակազմի հմտությունների և կարողությունների հզորացմանը տրամադրելով տեխնիկական միջոցներ և կազմակերպելով տարաբնույթ դասընթացներ:
